ဝီကီလိ ၀က်ဆိုက်က အကုန်ဖွင့်ချလိုက်ပြီ၊ မြန်မာပြည်အကြောင်း အများအပြား ပါဝင်

ဝီကီလိ ၀က်ဆိုက်က အမေရိကန်တို့၏ လျှို့ဝှက်ကြေးနန်း ၂ သိန်းခွဲကျော်ကို သောကြောနေ့က အများပြည်သူကြည့်ရှုနိုင်ရန် အင်တာနက်တွင် ဖော်ပြလိုက်သည်။
ရန်ကုန်မြို့ အမေရိကန်သံရုံးက ၀ါရှင်တန် နိုင်ငံခြားရေးဌာနထံပေးပို့သည့်စာအများအပြားလည်း ပါဝင်ရာ မာတိကာပင်လျှင် ၃၈ မျက်နှာရှိကြောင်း တွေ့ရသည်။
၂၀၀၂ မှ ၂၀၁၀ ဖေဖော်ဝါရီ လကုန်ပိုင်းအထိ ထောင်နှင့်ချီသော မြန်မာပြည်ဆိုင်ရာ သတင်းအချက်အလက်များ ဖြစ်သည်။ ၂၀၀၂ ရှေ့ပိုင်း လျှို့ဝှက်စာများလည်း အနည်းငယ် ပါဝင်သည်။

ဗိုလ်ချုပ်မှူးကြီးသန်းရွှေ၊ ၀န်ကြီး၊ ညွှန်ချုပ်စသည့် အစိုးရပိုင်းဆိုင်ရာတို့နှင့် တွေ့ဆုံဆွေးနွေးမှု မှတ်တမ်းများ၊ သံရုံးဝန်ထမ်းတို့ ရရှိသည့် သတင်းများ၊ နိုင်ငံရေး၊ ကျန်းမာရေး၊ စီးပွားရေး၊ လူ့အခွင့်အရေး၊ သဘာဝဘေးအန္တရာယ် ဆိုင်ရာ သတင်းများ ပါဝင်သည်။

ဗုံးကွဲမှု၊ ဗိုလ်ချုပ်ကြီးတို့နှင့်နီးစပ်သည့်လုပ်ငန်းရှင်များ၊ အစိုးရ ခေါင်းဆောင်များ၊ NLD နှင့် ဒေါ်အောင်ဆန်းစုကြည်၊ သူပုန်အဖွဲ့များ၏ အရေးပါသော လှုပ်ရှားမှုများလည်း ပါဝင်သည်။

အချက်အလက် မှတ်တမ်းများ၏ အဆုံးတွင် သံမှူး သို့မဟုတ် နိုင်ငံရေးဌာနတာဝန်ခံ၏ သုံးသပ်ချက်များကို တွေ့ရသည်။

NLD ခေါင်းဆောင်တို့ကို "NLDမှဦးလေးများ" ဟု ဖော်ပြလေ့ ရှိသည်။

ဝီကီလိသည် တရားမ၀င်သည့်နည်းလမ်းများဖြင့် ၎င်းတို့ ရယူထားသည့် အမေရိကန်သံရုံး၏ အတွင်းရေး သတင်းများကို ၂၀၀၉ အောက်တိုဘာလက စတင်ပြီး ဖွင့်ချခဲ့သည်။

သောကြာနေ့က ၀ီကီလိ၏ ထပ်မံ ဖွင့်ချမှုကို အမေရိကန်အစိုးရက ရှုတ်ချလိုက်သည်။ ယခင်က ၀ီကီလိပူးပေါင်းဆောင်ရွက်ခဲ့သည့် သတင်းဌာနကြီးများကလည်း ကန့်ကွက်လိုက်သည်။

The Guardian သတင်းစာကြောင့် အချက်အလက်အားလုံးကို ကြည့်ရှုနိုင်သည့် password ခေါ် ကွန်ပျူတာ လျှို့ဝှက်သင်္ကေတ ပေါက်ကြားသွားသဖြင့် လူတိုင်းကြည့်ရှုနိုင်ရန် ဖွင့်ချလိုက်ခြင်းဖြစ်သည်ဟု ၀ီကီလိက ပြန်လည် တုံ့ပြန်ထားသည်။

ဖွင့်ချလိုက်သည့် လျှို့ဝှက်အတွင်းရေးအများအပြားတွင် အမေရိကန်သံရုံးများကို ဆက်သွယ်သတင်းပေးသူတို့၏ ကိုယ်ရေးအချက်အလက် အသေးစိတ်များလည်း ပါဝင်နေသည်။

ရန်ကုန်မြို့ အမေရိကန်သံရုံးနှင့် ဆက်သွယ်နေသူများ၊ သတင်းပေးသူများ၏ အချက်အလက်များလည်း ပါဝင်သည်။

ဝီကီလိတွင် တွေ့ရသည့် အစီရင်ခံစာများတွင် UWSA ခေါ် ၀ တိုင်းရင်းသား သူပုန်အဖွဲ့၏ ကိုယ်စားလှယ် ဦးစိုးသန်းနှင့် တွေ့ဆုံစကားပြောမှုလည်း ပါဝင်သည်။

အစိုးရ၏ နယ်ခြားစောင့်တပ်အသွင်ပြောင်းရေး အစီအစဉ်ကို လက်မခံသည့် UWSA တွင် တပ်သားအင်အား သုံးသောင်းဝန်းကျင်ရှိပြီး အရံတပ်သား တသောင်းရှိကြောင်း၊
မြေပြင်မှ ဝေဟင်ပစ် လက်နက်များကို ၂၀၀၅ ခုနှစ်ကတည်းက ရုရှမှ ရရှိထားကြောင်း စသည့် ဦးစိုးသန်း၏ ပြောဆိုချက်ကို စာတစောင်တွင် ဖော်ပြထားသည်။

အမေရိကန် မူးယစ်တိုက်ဖျက်ရေးအဖွဲ့၏ မှတ်တမ်းများအရ UWSA သည် လက်နက်၊ စစ်ရေးသင်တန်း၊ စစ်ရေးဆိုင်ရာ အကြံပေးချက်တို့ကို တရုတ်ပြည်မှ ရသည်ဟုလည်း ထိုစာတွင် မှတ်ချက်ပြုထားသည်။

မန္တလေးတက္ကသိုလ်တွင် ပညာသင်ခဲ့သော ဦးစိုးသန်းက တရုတ်နိုင်ငံတွင်လည်း လေ့ကျင့်သင်ယူမှု ရှိခဲ့သည်ဟု ဆိုသည်။

ဗိုလ်ချုပ်ကြီးတို့၏လုပ်ငန်းရှင်များအကြောင်းလည်း အမေရိကန်သံရုံးက အထူး ဦးစားပေး စောင့်ကြည့်နေကြောင်းတွေ့ရသည်။ စာတစောင်တွင် လုပ်ငန်းရှင် ဦးတေဇ အခြေအနေ ပျက်နေပြီး တခြားသော ဧရာမလုပ်ငန်းရှင်ကြီးများ ပေါ်ထွက်လာပြီဟု ဆိုထားသည်။
ဗိုလ်ချုပ်မှူးကြီးသန်းရွှေ နှစ်သက်သည့် ဦးတေဇ ၂၀၁၀ ရွေးကောက်ပွဲ ၀င်မည်ဟု သတင်းရသည်ဟုလည်း စာတစောင်တွင် ရေးထားသည်။

အမေရိကန်သံရုံးနှင့် ပုံမှန် အဆက်အသွယ် ရှိသူများထဲတွင် ဒေါ်အောင်ဆန်းစုကြည်၏မိသားစု ဆရာဝန် ဒေါက်တာတင်မျိုးဝင်း ပါဝင်ကြောင်း အစီရင်ခံစာများအရ သိရသည်။

ဦးတင်ဦး အကျယ်ချုပ်ကျနေစဉ် ဇနီးဖြစ်သူ ဒေါက်တာ တင်မိုးဝေက ကြုံတွေ့နေရသည့် အခြေအနေများကို သံရုံးသို့ ပြောကြားခဲ့သည်။ "NLD က ဦးတင်ဦးမိသားစုကို လစဉ် ကျပ် ငါးထောင် (၄ဒေါ်လာခန့်) ထောက်ပံ့သည်။
ဂျပန်တွင်နေထိုင်သော သားဖြစ်သူက ဦးတင်ဦး လိုအပ်သည့် ဆေးဝါးများ ပေးပို့နိုင်ရန် သံရုံးက ကူညီစေလိုသည်" ဟု ဒေါက်တာတင်မိုးဝေက ပြောဆိုသည်ဟု ဖော်ပြထားသည်။

ဦးတင်ဦးက စာ အလွန်ဖတ်ပြီး National Geographic နှင့် Irrawaddy မဂဇင်းတို့ကို ကြိုက်နှစ်သက်သည်ဟုလည်း သူက ပြောကြောင်း စာတွင် ဖော်ပြထားသည်။

Posted in: Burma News