WUNPAWNG MUNGDAN SHANGLAWT ASUYA SHARE SHAGAN MASAT NINGHTOI A LAM

Wunpawng Amyu sha ni hte Wunpawng Mungdan sha ni gaw, 1947ning, February (12) ya shani na Panglung ga sadi hte maren, hpunau Myen, Sam, Jinghpaw, Hkang, Kayin, Kaya, Mun, Yahkai zawn re ai amyu sha ni hte rau British Kuluni uphkang ai lata na shanglawt la nna, Munghpawm mungdan langai jawm gaw de let nga pra wa saga ai.
-
Munghpawm Myanma Mungdan hpe uphkang na ningpawt ninghpang gaw da ai tara kanu (constitution) hpe jawm ka lajang masat shagrin la nna, dai gaw da ai tara kanu hte maren, Munghpawm Myanma Mungdan ngu ai kata e rau jawm nga pra wa ai. Raiyang, gaw da ai ningpawt ninghpang tara kanu hpe n hkan shatup nna rau nga rau pra shada, dip up ai lailen ni nga wa ai.
-
 Grau law ai Myen amyu ni gaw, n law n’na naw grit nem nga ai kaga amyu sha (Ethnic groups) ni a ntsa e dip up ai lailen gaw lani hte lani wum ja wa ai majaw, masha jahpan n law ai hte naw kaji kadun nga ai amyu sha ni gaw, mungmasa ahkaw ahkang lam, n’pawt n’hpang shinggyim ahkaw ahkang lam, Demukrisi ahkaw ahkang lam, hte kaga ahkaw ahkang lam ni hpe tat sum kau ai madang de du mat wa sai.
Ndai zawn, lu ra, lu ging ai ahkaw ahkang hte ahkang aya lam ni hpe tat sum kau ai hpe mungmasa ku ntsa kaw sha garu hkat nna, hpa lam hpe mung bai dara di la lu na lam n nga mat sai hpe mu mada ai mung tsaw, myu tsaw share shagan ningshawng ningla ni gaw, shing rai tat sum kau ai mung masa ahkaw ahkang lam hte ahkang ya lam ni hpe bai lu la na matu, laknak lang nna rawt malan gasat la ra sai ngu daw dan nna 1961 ning, February Shata (5) ya shani kaw nna Amyu sha rawt malan majan baw hpang sai.
-
 Ndai zawn mung tsaw, myu tsaw share shagan ningshawng ningla ni e woi awn daw dan ai hte maren, anhte gaw, laknak lang nna rawt malan gasat ai lam galaw wa saga ai.
Laknak lang rawt malan gasat sa wa ai hkrun lam hta amyu hte mungdan hpe tsaw ra ai ningshawng ningla, myit rum share shagan law law wa tinang a asak hpe ap nawng ai kaw du hkra gasat poi shang lai wa masai.
Dai zawn asak ap nawng lai wa ai lam hta Wunpawng Mungdan Shanglawt Hpung Ginjaw Komiti Tingnyang Up, KIC Ningbaw hte KIA Dap Up Daju makan lit hpe gunhpai lai wa sai Ningbaw Kaba Usa (GOC) Lahtaw Zau Seng gaw 1975 ning August shata (10) ya shani Thailand Mungdan kata e Dap jung da ai OKFA Dabang de lung wa ai hkrun lam kaw tai hpyen a maw mawn ai kata kaw hkrat sum nna asak ap nawng lai wa sai.
-
 Dai hte maren, Ginjaw komiti Tingnyang Up Malai, KIC Ningbaw Malai hte KIA Tau Dap Awn Daju Makan lit gun hpai nga ai Du Up Daju Lahtaw Zau Tu hte Ginjaw Komiti Ninggawn Amu Madu Makan lit gunhpai nga ai Salang Kaba Pung Shwi Zau Seng gaw, 1975 ning August (6) ya shani OKFA Rung Dabang de lung wa ai lam e tai hpyen wa a masha ni a lata hta hkrat sum asak ap nawng lai wa masai.
-
Ningbaw ningla, hpu-awn kaji kaba, dap ma mung shawa ni law law gaw, tinang Wungpawng Mungdan hte Wunpawng Amyu Sha ni a ntsa tsaw ra myit majing rawng nna sadi dung let asak ap nawng lai wa sai. Share shagan myit rum manang ni yawng hpe hkungga shagrau, masat masa galaw ai hku nna, Wunpawng Mungdan Shanglawt Asuya gaw, Wunpawng Mungdan Shanglawt Asuya a shawng ningnan No. 1 Ningbaw kaba makan lit gun hpai lai wa ai GOC Lahtaw Zau Seng asak ap nawng mat wa sai. 1975 ning, August shata (10) ya hpe la nna, dai ninghtoi hpe SHARE SHAGAN NINGHTOI ngu masat dat ai rai.

Shaning shagu August shata (10) ya hta anhte gaw share shagan ninghtoi ngu masat ninghtoi kaba hku masat dingsat hpawng galaw ra ai. Dai masat ninghtoi hta, myu hte mungdan hpe tsaw ra nna share shagan let asak ap nawng lai wa sai hpu shawng hpu ba share manang ni hpe myit dum, n’gun la let shanhte shakut kau da nna garai n ngut n kre ai anhte a yaw shada ai pandung shadaw du, padang dip la lu ai kaw du hkra an hte yawng da kring da lang, magrau grang grang rawt malan gasat poi shang sa wa dingyang rai ra nga ga ai law.

Posted in: