မြန်မာနိုင်ငံ အခြေစိုက်သင်္ဘောလိုင်းအချို့၏ သင်္ဘောများတွင် တာဝန်ထမ်းဆောင်နေသည့် မြန်မာသင်္ဘောသားများအား လုပ်ငန်းခွင်တွင် ခွဲခြားဆက်ဆံသည့် ဖြစ်စဉ်များပိုမို ကြုံတွေ့လာရပြီး ခွဲခြားဆက်ဆံနေသည့် ကုမ္ပဏီမှာ ကိုရီးယားသင်္ဘောလိုင်း အချို့နှင့်ဂျပန်သင်္ဘောလိုင်း အချို့တို့ဖြစ်ကြောင်း သိရသည်။
ကိုရီးယားသင်္ဘောလိုင်း အချို့ အသက်အန္တရာယ်နှင့် ရင်ဆိုင်ရနိုင်ခြေရှိသည့် လုပ်ငန်းပိုင်းများတွင် မြန်မာ သင်္ဘောသားများကိုသာ အဓိကပြုလုပ်စေခြင်းများအား လက်ရှိအချိန်တွင် ပိုမိုကြုံတွေ့လာရကြောင်း ယင်းသင်္ဘောလိုင်းများတွင် လုပ်ကိုင်ခဲ့သည့် သင်္ဘောသားများက ပြောပြခဲ့သည်။
“ကျွန်တော်က ကိုရီးယားသင်္ဘောလိုင်း တစ်ခုကနေ သင်္ဘောတက်သွားခဲ့တာပါ။ သင်္ဘောပေါ်မှာ မြန်မာလေးယောက်ပဲ ပါတယ်။ အရာရှိတွေနဲ့ ကျန်သင်္ဘောသားတွေက ကိုရီးယား တွေချည်းပဲ။ လုပ်ငန်းခွင်မှာ သူတို့ကျတော့ လက်အိတ်ကို ရာဘာလက်အိတ်ရော၊ ချည်သားလက်အိတ်ပါ နှစ်ထပ်သုံးတယ်။ ကျွန်တော့်ကျတော့ ဒီလို သုံးခွင့်မရှိဘူးလို့ ပြောတယ်။ ကိုယ့် ပိုက်ဆံနဲ့ ကိုယ်ဝယ်သုံးတော့လည်း မသုံးရဘူး ပြောတယ်။ ကျွန်တော် သည်းမခံနိုင်လို့ ပြန်ဆင်းလာတာ သင်္ဘောပေါ်မှာ ၂၄ ရက် ကြာခဲ့ပါတယ်” ဟု ကိုရီးယား သင်္ဘောလိုင်းတစ်ခု၌ သင်္ဘောတက်ခဲ့သူ တစ်ဦးဖြစ်သည့် ကိုမင်းမင်းစိုးက ပြောပြခဲ့သည်။
မြန်မာနိုင်ငံ အခြေစိုက် ကိုရီးယား သင်္ဘောကုမ္ပဏီများ၏ ဌာနေ ကိုယ်စားလှယ် အချို့မှာလည်း မိမိကုမ္ပဏီ မှ သင်္ဘောတင်ပေးလိုက်သော မြန်မာ သင်္ဘောသားများနှင့် ပတ်သက်၍ ဖြစ်ပွားလာသော ပြဿနာများအား တာဝန်ယူမှုမရှိခြင်း၊ မြန်မာ သင်္ဘောသားများ၏ ရပိုင်ခွင့်များ နှင့် ပတ်သက်၍လည်း တာဝန်ယူ တောင်းဆိုပေးနိုင်မှု မရှိခြင်း၊ သင်္ဘောကုမ္ပဏီ တာဝန်ရှိသူများက သင်္ဘောပေါ်တွင် မြန်မာသင်္ဘောသား သေဆုံးသည်ကိုပင် မိသားစုဝင်များအား အသိပေးခြင်း မရှိသည်အထိ ပြုလုပ်နေမှုအချို့လည်း ရှိနေကြောင်း သိရသည်။
“ကိုရီးယားနိုင်ငံ ဆိပ်ကမ်းတစ်ခုမှာ မြန်မာသင်္ဘောသား တစ်ယောက် ရဲ့ အလောင်းပေါ်တာ တွေ့တယ်။ ဘယ်သင်္ဘောက ဘယ်သူဆိုတာလည်း သိကြတယ်။ ဒါပေမဲ့ မြန်မာနိုင်ငံကို ရောက်တော့ အဲဒီသင်္ဘော ကုမ္ပဏီက မိသားစုကို ဒီသင်္ဘောသားက ခုန်ဆင်းသွားတယ်၊ ပျောက်ဆုံးသွားတယ်လို့ ပြောထားတယ်လို့ သိရတယ်။ ကာယကံရှင် သင်္ဘောသား သေဆုံးတာကိုတောင် မိသားစုဝင်တွေကို အသိမပေးတဲ့ ဌာနေကိုယ်စားလှယ်ကို မိသားစုဝင် တွေက သက်ဆိုင်ရာအဆင့်ဆင့် ကို တိုင်ကြားမှုတွေ လုပ်ထားတယ်လို့ ကြားတယ်”ဟု ဇွန်လကနိုင်ငံသို့ ပြန်လည်ရောက်ရှိသည့် မြန်မာသင်္ဘောသားက ဆိုသည်။
“ဓာတ်ငွေ့သိုလှောင်ကန်ကို လုံခြုံစိတ်ချရတဲ့ ကာကွယ်မှုတွေ မလုပ်ဘဲ မြန်မာသင်္ဘောသားကို ဆင်းခိုင်းတယ်၊၊ သူတို့လူမျိုး အချင်းချင်းကျတော့ မခိုင်းဘူး “ ဟု ကိုရီးယား သင်္ဘောလိုင်းတစ်ခုမှ ပြန်ရောက်လာသည့် ဦးခင်မောင်မြင့် ကဆိုပါသည်။
0 comments:
Post a Comment
Thankyou for visiting my site.